கேபிள் டீவி இல்லாத ஊர்

சில பல வகையாக
இப்படி இருக்கும்
கேபிள் டிவி இல்லாத
ஊர் என்பது

காற்றில்
மெல்லினம் மட்டுமே
பரவி வரும்

பேசப்படுவது
நல்லினம் மட்டுமே
இருக்கும்

தருதலும் பெறுதலும்
முத்தமாக
மட்டுமே இருக்கும்

பகிரப்படுவதாகக்
கவிதைகள் இருக்கும்
கரையான் புற்று
நம்மீது
கூடு வைக்காமல் இருக்கும்

வருகின்ற விருந்தினர்
சாத்தானின் அண்ணாக
இல்லாமல் இருக்கும்

கண்ணோடு கண் நோக்குதல்
விளம்பர இடைவேளையில்
மட்டுமில்லாமல் இருக்கும்

குழந்தைகள்
பார்த்தீனியம்
ஆகாமல் இருக்கும்

உணர்ச்சி உணர்ச்சியாகவே
இருக்கும்
வஞ்சத்தின் நிழல்
இல்லாமால் இருக்கும்.

புணர்ச்சி
புணர்ச்சியாக இருக்கும்
கள்ளத்தின் வலை
இல்லாமல் இருக்கும்

நாமாகவே இருக்கும் வாழ்க்கை
வாய்ப்பதாக இருக்கும்

தொடர் போதையில்
தள்ளாடாத
ஊராகவே இருக்கும்

ஆனால்
நமக்குத்தான் பிடிப்பதில்லையே

ஊராக இருக்கும் ஊரும்
புணர்ச்சியாக இருக்கும் புணர்ச்சியும்

- ஆண்டாள் பிரியதர்சினி, கல்கி இதழில்.

படித்ததும்  பிடித்தது
பகிர்ந்திட துடித்தது
உனக்கும் பிடித்திருந்தால்
உள்(ள)த்தை பகிர்ந்து செல்
இப்பக்கத்தில்...